Кама Тамагы делегациясе «Ел хатын-кызы. Ел ир аты: хатын кыз карашы» республика конкурсы лауреатларын бүләкләү тантанасында

7 март көнне, Халыкара хатын-кызлар көне алдыннан, С. Сәйдәшев исемендәге Зур концертлар залында «Ел хатын-кызы. Ел ир-аты: хатын-кыз карашы» республика конкурсы лауреатларын бүләкләү тантанасында Татарстан Президенты Рөстәм Миңнеханов һәм ЮНЕСКО генераль директоры Одре Азуле катнаштылар. «Хатын-кыз җәмгыятьтә зур роль уйный, һәм гомумән, безнең бөтен тормыш гаилә белән бәйле. Сез иң актив һәм алдынгы кешеләр, үз торак пунктлары, Татарстан һәм Россия үсешенә өлеш кертәсез. Сезнең баруыгыз өчен рәхмәт», – дип мөрәҗәгать итте ТР Президенты Татарстанның барлык хатын-кызларына. Әлеге чарада безнең район вәкилләре дә катнашты. Кама Тамагы районы делегациясе 10 кешедән торган иде - алар зональ һәм республика конкурсларында җиңүчеләр һәм катнашучылар, районның хәйрия чараларында актив катнашучылар.