Рөстәм Миңнеханов эшкәртелми калган җир кишәрлекләренә анализ ясарга кушты
ТР буенча дәүләт теркәве, кадастр һәм картография федераль хезмәте идарәсе коллегиясенең киңәйтелгән утырышында ТР Президенты Рөстәм Миңнеханов катнашты. Анда төп доклад белән Росреестрның ТР буенча идарәсе җитәкчесе Азат Җаббаров чыгыш ясады. Рөстәм Миңнеханов идарә эшчәнлеген уңай бәяләде.
Президент Җир кишәрлекләрен хуҗалык әйләнешенә кертүгә игътибар итте. Эшкәртелми калган, ташландык җир кишәрлекләре бар-бу теманы игътибар белән карарга кирәк, дип билгеләп үтте ул. «Республика Җир һәм мөлкәт мөнәсәбәтләре министрлыгына, муниципаль район башлыклары белән берлектә, үзләштерелмәгән җирләргә анализ ясарга, шулай ук әлеге җирләрне авыл хуҗалыгы билгеләнешендәге җирләр категориясенә кайтарып, торак пункт чикләреннән чыгару мәсьәләсен эшләргә кирәк, – диде Рөстәм Миңнеханов. – Республиканың авыл хуҗалыгы һәм азык-төлек министрлыгына авыл хуҗалыгы билгеләнешендәге җирләрдән төзелә торган җир кишәрлекләренең минималь күләмен билгеләү турындагы закон проектын әзерләргә һәм Дәүләт Советына карауга кертергә кирәк».
Рөстәм Миңнеханов шулай ук ТР Җир һәм мөлкәт мөнәсәбәтләре министрлыгына, ТР Юстиция министрлыгы белән берлектә, җир кишәрлекләренә документлары булмаган һәм аларда урнашкан торак йортларга милек хокукын гадиләштерелгән тәртиптә рәсмиләштерергә мөмкинлек бирүче закон проектын әзерләргә кушты, әлеге торак урыннары бердәнбер торак булган очракта һәм әлеге адрес буенча гражданнарны теркәү 1991 елга кадәр үткәрелде. Бу хакта ТР Президенты матбугат хезмәте хәбәр итә.