Кадет мәктәбенә исем бирелде

Михаил Алексеевич Чирков 1898 елда районыбызның Кирельск авылында туган. Хәрәкәттәге армиягә 1942 елда эләгә. 167нче гвардия җиңел артполк телефонисты рядовой Михаил Чирков 1943 елның сентябрендәге бәрелешләрнең берсендә дошман уты астында командованиене уң як ярдагы разведка төркеме белән элемтәсен тәэмин итеп, Днепр аша кабель линиясе суза. Артиллеристлар утын төзәтергә ярдәм итә, дошман һөҗүмен кирегә кагарга булыша. Советлар Союзы герое исеме аңа 1943 елның 17 октябрендә бирелә. Ленин, Кызыл Байрак, Кызыл Йолдыз орденнары, медальләр белән бүләкләнә. 1945 елның 3 февралендә бәрелешләрнең берсендә хәлак була. Тимендорф торак пункты костелендә җирләнгән (Глогау районы, Германия). Кама Тамагы штпда герой исемендәге урам бар, хәзер исә кадет мәктәбе Михаил Чирков исемен йөртә.