Спорт белән шөгыльләник

Районыбызда халыкның сәламәтлеген ныгытуга һәм спорт хәрәкәтен  үстерүгә зур игътибар бирелә. Спорт дөньясы таләпләренә җавап бирүче менә дигән урын – «Акчарлак» ССК бар. Биредө балалар, яшьлөр төрле спорт түгәрәкләрендә шөгыльләнә. Тренерлар алар белән осталыкларын бүлешә.
Шуларның берсе – йөзү буенча тренер Раил Яруллин балаларны йөзәргә өйрәтә. 3-7 яшьлекләр һәм 7-14 яшьлекләрдән ике  төркем оештырылган.  Күнегүләр сентябрьдән майга кадәр үткәрелә. Балалар атнага 3 тапкыр шөгыльләнә. Җәйге каникул вакытында да бассейн буш тормый – лагерьларда ял итүче балаларны автобус белән алып киләләр, шулай ук гаиләләре белән ял итәргә килүчеләр, районыбызга кунакка кайтучылар да йөри.
«Укучыларым арасында сәләтле балалар шактый, – ди Раил. – Балаларыбыз район һәм зона ярышларында катнашып, яхшы күрсәткечләргә ирешә. Спорт тәнне генә түгел, рухны да камилләштерә, максатка ирешүдә тырышлык тәрбияли, холыкны ныгыта».