Йомгаклау медицина советы
Кама Тамагы үзәк район хастаханәсендә медицина учреждениесенең 2025 елдагы эшчәнлегенә йомгак ясалды һәм 2026 елга төп бурычларны билгеләделәр.
Киңәшмәдә Татарстан Республикасы Сәламәтлек саклау министры урынбасары Яркаева Фәридә Фатыйх кызы, Кама Тамагы муниципаль районы башлыгы Вазыхов Наил Альберт улы, шулай ук Кама Тамагы үзәк район хастаханәсе баш табибы Минвәлиев Ильяс Илдус улы катнашты.
Доклад белән Кама Тамагы үзәк район хастаханәсе баш табибы чыгыш ясады. Ильяс Илдус улы хастаханәнең узган елдагы төп эш нәтиҗәләренә җентекле анализ ясады, билгеләнгән проектларны гамәлгә ашыру барышын яктыртты, яңа фельдшер-акушерлык пунктлары ачылу, халыкны диспансерлаштыру күрсәткечләре, шулай ук учреждениенең матди-техник базасын модернизацияләүгә һәм ныгытуга юнәлдерелгән чаралар турында сөйләде.
Моннан тыш, Олы Салтык авылы фельдшер-акушерлык пунктының 2025 елдагы эшчәнлеге турында тулы күрсәткечләр белән хисап тыңланды.
Сәламәтлек саклау министры урынбасары һәм район башлыгы җавап сүзе белән чыгыш ясады. Алар Кама Тамагы үзәк район хастаханәсе коллективына фидакарь хезмәтләре, үз эшенә тугрылыклары һәм сәламәтлек саклау системасын үстерүгә керткән зур өлешләре өчен тирән һәм ихлас рәхмәт белдерделәр, шулай ук хисап чорында күрсәткән югары һөнәри казанышлары өчен рәхмәт белдерделәр.
Йомгаклау медицина советы Кама Тамагы үзәк район хастаханәсе хезмәткәрләрен бүләкләү тантанасы белән тәмамланды.