Кама Тамагы районы гаиләсе Казан Кремлендә Татарстанның иң яхшы гаиләләрен хөрмәтләүгә багышланган тантаналы кабул итү мәҗлесендә катнашты
24 августта Казан Кремлендә ТР Президенты Рөстәм Миңнеханов исеменнән Татарстанның иң яхшы гаиләләрен хөрмәтләүгә багышланган тантаналы кабул итү мәҗлесе узды. Кабул итүдә республиканың 51 гаиләсен хөрмәтләделәр, дүрт хатын-кызга «Ана даны - Материнская слава» медале тапшырылды.
Кама Тамагы муниципаль районы исеменнән Тенеш штп Камалетдиновлар гаиләсе катнашты.
«Республика көне алдыннан без Кремльгә республиканың үрнәк гаиләләрен чакырабыз. Гаилә-ул дәүләтнең нигезе. Без гаилә кыйммәтләренә сакчыл карыйбыз. Бу көннәрдә Казанда һөнәри осталык буенча дөнья чемпионаты уза. Сезнең һәрберегез-үз эшенең остасы, башкаларга үрнәк. Без үсеп килүче буынны сезнең үрнәктә тәрбиялибез. Балалар - безнең киләчәгебез», - диде Президент.
Рөстәм Миңнеханов җыелган гаиләләргә актив тормыш позициясе өчен рәхмәт белдерде, якынлашып килүче Республика көне белән котлады һәм мондый очрашуларның ешрак узуын теләде.